ՈՒՂԵՐՁ ՀՀ ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐ
«ԾԻՐԱՆԻ ԾԱՌ» ՎԱՎԵՐԱԳՐԱԿԱՆ ՖԻԼՄԵՐԻ
ՄԻՋԱԶԳԱՅԻՆ ՓԱՌԱՏՈՆԻ
ԿԱԶՄԱԿԵՐՊԻՉՆԵՐԻՆ ԵՎ ՄԱՍՆԱԿԻՑՆԵՐԻՆ
Սիրելի բարեկամներ,
Ջերմորեն ողջունում եմ «Ծիրանի ծառ» վավերագրական ֆիլմերի միջազգային փառատոնի կազմակերպիչներին, հյուրերին և մասնակիցներին փառատոնի մեկնարկի կապակցությամբ:
Փառատոնն իրավամբ ապացուցել է իր կենսունակությունը, դարձել Հայաստանի մարզային մշակութային կյանքի անբաժանելի մասը, հայկական վավերագրությունը օտարազգի արվեստագետներին և կինոգործիչներին ներկայացնելու լավագույն հարթակ։
Միևնույն ժամանակ, «Ծիրանի ծառ» կինոփառատոնը հնարավորություն է ընձեռում հայ կինոսերներին ծանոթանալու համաշխարհային վավերագրությանը, օտարազգի կինոգործիչների աշխատանքներին։
Վստահ եմ, որ այս տարի ևս, երբ մենք նշում ենք Հայ կինոյի 100-ամյակը, փառատոնն իր հագեցած ծրագրով անմոռանալի պահեր կպարգևի բոլոր մասնակիցներին, հետաքրքիր հարթակ դառնալով նոր մտքերի և փորձի փոխանակման համար:
«Ծիրանի Ծառ» վավերագրական ֆիլմերի փառատոնի կազմակերպիչներին մաղթում եմ նորանոր հաջողություններ, մասնակիցներին՝ ստեղծագործական ներշնչումներ և հետաքրքիր մտահղացումներ, իսկ փառատոնի հանդիսատեսին` գեղագիտական վառ տպավորություններ:
ՀՀ ԿՐԹՈՒԹՅԱՆ, ԳԻՏՈՒԹՅԱՆ,
ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐ
ԺԱՆՆԱ ԱՆԴՐԵԱՍՅԱՆ
